政情：何鴻燊捐380萬助日本救災
「修身、齊家、治國、平天下」，孔子學說真係古今都啱用，好似以大智慧圓滿解決家庭紛爭嘅賭王何鴻燊，近日好關心日本大地震及海嘯引發嘅災情，燊哥尋日就捐出三百八十萬港元，經香港紅十字會轉送到日本災區，此舉獲日本駐港總領事隈丸優次親身代表日本及日本國民表示衷心致謝。
燊哥話，見到災情之嚴峻，佢深感哀痛，並致以深切慰問及誠摯嘅祝福，但佢亦相信以日本人堅定嘅信心同努力，以及各方嘅關懷同支援，一定可以克服危機，早日重建家園。深諳日文嘅燊哥，仲用日文向日本市民送上祝福，勉勵佢哋要努力加油：「衷心祈求大家都平安無事，謹此致以慰問，請大家加油！」
燊哥同日本淵源甚深，一直推動港澳同日本嘅經濟合作，所以早喺八七年已獲日皇頒授「勳三等瑞寶章」，表揚佢喺促進三地相互了解同密切關係上嘅傑出貢獻，難怪今次日本發生事故，燊哥零舍關注。