中環耳目：林健鋒梁君彥十卜日本菜
香港日式食肆近日因為日本核輻射危機搞到生意大跌，部分更因此而結業。作為商界及中小企代表嘅經濟動力立法會議員林健鋒（Jeffrey）同梁君彥（Andrew），尋日就去咗銅鑼灣嘅日本人俱樂部食晏，希望挽回港人食日本菜嘅信心之餘，仲以示對日本嘅支持。
兩位議員話，唔擔心食材受輻射污染，因為大部分輸港嘅日本食材都唔係來自受影響嘅地區，所以呼籲大家可以放心食用喎。Andrew仲透露，尋日朝早先至做完身體檢查，照完X光後已經受咗輻射啦，所以唔理咁多，幾大食咗先至算。佢哋每人叫咗個便當，內有魚生、天婦羅同煮物，相當豐富。
Jeffrey就話，佢經常喺呢間日本人俱樂部食飯，皆因食材新鮮而且價錢合理。
佢又提到，目前港人唔食魚生外，就連和牛亦少食，搞到某啲賣開日本高級和牛嘅日式餐廳，亦被迫改由澳洲同美國入貨，以免影響生意。總之一句，佢哋希望大家唔好太杞人憂天，以免得不償失喎。