中環出更：陳正欣撐藝術四大師助陣
香港成日畀人話係文化沙漠，但有心令藝術普及嘅人都唔少，好似啱啱冧莊做保良局總理嘅百利建國際董事總經理陳正欣，就慷慨解囊贊助香港大學第二屆「學院藝術家計劃」，支持四位大師級藝術家進駐校園與大學生近距離接觸。學生仲有機會喺名導演張婉婷嘅新戲內做臨時演員，親身體驗電影製作過程添！
提升學生品味
四位獲委任嘅大師包括音樂指揮家葉詠詩、視覺藝術家谷文達及被喻為黃金拍檔嘅電影導演張婉婷及羅啟銳，佢哋合作拍攝嘅《歲月神偷》曾哄動一時。來自內地嘅當代藝術家谷文達打算帶學生去深圳及北京開眼界，張大導同羅啟銳就諗住搞個影片比賽，發掘學生嘅潛質；又諗住帶學生去上海拍片現場，實地參與佢哋拍緊嘅一套以四、五十年代為背景嘅新戲。
四人感慨香港冇咩藝術活動吸引遊客，好似內地客來港只識勁掃名牌。咁啱陳正欣正係代理名牌手錶，佢話今次應港大校長徐立之邀請捐助該計劃，正正係想提升九十後嘅多元化發展。