中環出更：九巴公主帶男友見「家長」
蜜運中嘅「九巴金公主」伍穎梅（Winnie），同男友中建企業董事許晉平拍拖嘅曝光率漸趨頻密，早幾日仲撞正同屬九巴嘅非執董陳祖澤（John）添！卓妮大前晚七點鐘行開中環ifc，又見Winnie同男友拖手仔行街，當佢哋行到三樓「正斗」粥麵專家門口時，就巧遇着西裝嘅阿John同朋友等位開餐，估吓當時大家碰面有乜反應呢？
陳祖澤熱情握手
話晒大家同喺九巴屋簷下，Winnie見到長輩阿John，即時高興介紹身邊男友，阿John隨即上前同許晉平握手打招呼，兩個大男人握手時嘅認真表情，似足女方帶男友見家長咁款，搞到卓妮都心思思想知Winnie帶咗男友見家長未添！大家寒暄咗幾句後就揮手講再見，Winnie繼續同男友拍拖行街，而阿John就準備攞位歎「正斗」美食，但現場未見陳太嘅蹤影。
唔經唔覺，Winnie同許晉平蜜運咗大半年，佢哋嘅戀情係卓妮直擊爆料嘅，記得當日見佢哋喺置地廣場Cafe Landmark「手疊手」談心，當時佢哋一見卓妮就即時避忌彈開，Winnie仲怕醜到唔肯認對方係男友添。不過，至今感情已經好穩定，Winnie有時仲會大方談及同男友嘅甜蜜事，好似早前許生就特登訂造咗對綠色翡翠閃鑽耳環畀佢做生日禮物，莫非許生想伊人日日「掛住」佢？
卓妮