龔在華懋頂樓養狼狗猴子
「太太好鍾意狗，Nina又好鍾意狗，」陳振聰在講及郊遊錄影帶中提及的「威威」是誰時，不經意爆出一個小甜甜養猴子的秘密。他說，「威威」其實是小甜甜養的狼犬，除了「威威」，小甜甜還有「芝芝」作伴，記者問他「芝芝」是不是小狗，陳振聰說是一隻可愛的小猴，很討小甜甜喜歡，「芝芝」平日生活在尖東華懋頂樓小甜甜的廚房內，有時還和陳、龔二人同枱吃飯。
「其實我非常之驚狗！」
「其實我非常之驚狗！」陳振聰說，曾和龔如心愛犬狼狗「威威」共處一室，他卻自揭是怕狗之人，「細狗都可以玩一陣，大狗真係唔得，一放佢出廳我就唔敢郁！」
當年在華懋頂樓小甜甜的臥室，會看着「威威」睡覺，「佢瞓咗，我都唔敢郁望住佢，但佢又對我好好，會舔吓我，我就畀佢舔。」他說：「佢（龔如心）仲有隻芝芝」，追問之下，陳才說芝芝其實是隻精靈猴子，他說：「我聽講係有員工送畀佢」，平日飼養在華懋總部頂樓廚房，「嗰時我哋同芝芝一齊同枱吃飯。」陳振聰又說，小甜甜對養芝芝一事很低調，但偶然會帶牠一起坐私家車巡地盤。
現時陳振聰家中養了八隻狗，他說因養狗，曾引發三名子女抗議，「二○○○年左右，仔女開始提出養狗，我話我唔鍾意，佢哋一路爭取，有一日貼到成屋都係標語話要養狗，仲插埋旗喺單車度，喺個廳度踩嚟示威。」他就滿足「民意」批准家中養狗，後來還愈養愈多，「其實係我驚啫，唔代表狗唔可愛嘅。」陳振聰稱，他和龔如心相處十多年，大家都好遷就對方，其實這也與他「無咩所謂」的性格有關係。