我在臭格的日子
「真係發夢都無諗過會畀人塔走，真係無諗過！」進身億萬富翁的陳振聰，涉嫌偽造文件被捕，昨日再到警署報到，獲准保釋候查。然而當日他被反鎖雙手拘捕、押到警署「臭格」覊留直至獲准保釋的整整卅二小時，令他畢生難忘。陳振聰接受本報專訪時，自言對探員大陣仗登門大為震驚，面對被手銬反鎖的窘態，心情很差，只好自己用衫遮住手銬，免被記者影到，他形容在「七號差館」瞓石床度過夜凍到震，一盒餐蛋飯反而令他回味無窮。
去年二月三日，即原訟庭就爭產官司裁決陳敗訴的翌日下午四時，陳振聰在山頂的大宅為判決一事思量萬千，商罪科探隊突然登門殺個措手不及，「之前我真係唔知，突然間好多人嚟話搜屋，佢哋有搜令嘅，我冇律師喺度。」他形容當時很震驚，「佢哋主要開啲電腦嚟睇，有啲攞走咗，連我個仔部電腦都要睇。」陳振聰說，他的其中一名兒子還和探員拗氣，「我啲仔仲話，電腦入面係我啲games（遊戲），我無非法下載喎，全部正版喎！而嗰個外籍警司都好好，同我個仔慢慢解釋，話唔係查你非法下載，做完嘢會畀番你。」陳振聰說：「我同佢哋講，鍾意攞咩隨便攞。」更笑對記者說：「我連鹹書都無一本！」
當陳振聰被帶到門外，探員要給他上手銬，這時他感到難堪，「佢（探員）話要用手銬，咁我問唔用得唔得呢？個警司話唔得，咁唔得無辦法啦。」問他知不知為何被反鎖，陳稱：「我唔識喎，咁佢係警察啦，咁我問咗佢話唔得，咁無理由反抗架，無辦法啦，唔得咪即係我反抗佢？」
瞓石床冇墊褥 凍到震
為了不讓傳媒拍到，他用衫遮掩被反鎖的雙手，「隻手真係痛嘅，頂住個背脊，係真係痛，無辦法啦，搵件衫遮住佢啦，咁警察都有話閂埋窗簾，但係都影到嘅。」說起當時心情，陳振聰臉色沉了下來，「心情好差，但唔係好惡劣。」
陳振聰憶述，當晚被帶到山頂警署，再被帶返警察總部，然後又去宏霸寫字樓，最後被押到俗稱「七號差館」的西區警署羈留。這一晚令他畢生難忘，他說有兩件事給他烙下難以磨滅的印記，第一件是要瞓石床，「差館真係比較凍，真係要改善吓，可以形容吓囉，聞說其他羈留室有墊褥架，但七號差館係無架喎，真係千祈唔好去七號差館喎，佢原來全部係石嘅，凍冰冰！嗰時都好凍吓架，陳振聰形容囚室的寒夜時，七情上面，他對幫他保暖的當值警官心存感激，「咁我又要讚吓當時個幫辦，佢都幾好嘅，佢畀好多毛氈我，佢話無辦法啦，盡量墊多啲氈啦，呢度係凍冰冰架。」
七號差館美食 餐蛋飯
除了捱凍，為防疑犯出事，被覊留人士吃飯要吃無骨食物，喝水要用紙杯。「咁第二件事就係攞水要叫佢（警察），咁係正確嘅，但係唔方便囉，因為我飲好多水嘅，咁原來尖腳杯又放唔到又儲存唔到，飲完都唔知放去邊度好，周圍都好污糟架嘛！都唔知放去邊度，咁惟有袋入袋，但摺埋袋入袋之後又裝唔到水。」他說最欣賞差館的膳食，「朝早都有早餐嘅，有個三文治有杯奶茶。」、「餐蛋飯好食嘅，我鍾意食嘅，係我最鍾意食嘅嘢嚟架！好美味嘅一餐呀！因為我唔知佢仲要扣留幾耐呀，幾大都要食晒佢呀真係！哈哈！」度過「臭格」一夜後，翌日他又被帶到警察總部落口供，直至二月五日凌晨零時許，才獲准以五百萬元保釋。
傳聞妻子譚妙清送飯到差館，他即連連耍手，又瞄一瞄客廳另一邊的妻子：「唔係！無無！無人畀嘢我食，差館有架。佢（妻子）邊有對我咁好呀？你（指自己）嘅事關我咩事呀？你自己個女友（龔如心）搞出來嘅事，唔關我事。」問他太太受牽涉帶署是否好嬲？「梗係嬲啦，咩唔嬲呀！爭在未話我抵死咋，哈哈哈，佢無出聲呀，佢唔表態啦，佢點會送飯我食吖！」