千呼萬喚之下，勞工處終於公布《法定最低工資僱主及僱員參考指引》，列出三十幾個具體例子，教大家點樣遵守五月一日實施嘅最低工資法例。之不過，對於最具爭議性嘅假日同飯鐘問題，當局依然置身事外，繼續強調法例冇規定食飯時間同假日必須有薪，叫勞資雙方自己傾掂數。
假日飯鐘冇指引，令最低工資法例出現灰色地帶。難怪工會擔心僱主鑽法律罅，喺新例實施前更改僱傭合約，削減員工福利，將食飯時間同假日改成無薪，七除八扣之下，基層打工仔嘅收入唔止唔會增加，甚至可能減少。
計功夫茶話齋，勞工團體嘅憂慮唔係冇道理o架。事關新例仲未實施，已經有唔少僱主出招迎戰，招式包括逼假自僱、斬頭去尾計工時等等，五花八門，層出不窮，甚至有食環署外判商推行罰款制度，喺政府眼皮底下剝削員工。舊年大家樂喺輿論壓力下取消扣飯鐘計劃，如果唔係，部分僱員收入已經因加得減。
正所謂，你有張良計，我有過牆梯，何況官府話明「假日同飯鐘未必有錢」，變相邀請僱主鑽法律罅。慘就慘在，一班低收入打工仔左望右望，望到頸都長埋，原本希望最低工資實施改善收入，到頭來可能得個吉。
退一步講，就算打工仔嘅收入唔會因加得減，到底假日飯鐘計唔計錢、點樣計法，將來都係有排拗嘅。所以工會要求政府立法訂明計算飯鐘錢嘅細節，避免引起爭拗；商界人士亦贊成立法解決爭議，認為政府有責任釐清飯鐘錢問題。可見，勞資雙方都希望政府主持公道。
講到底，最低工資立法爭議多多，因為僱主追求低成本，打工仔希望提高收入，雙方利益互相衝突，根本就冇可能達成共識。正因為咁，政府更加應該積極扮演中間人嘅角色，既要令僱主信服，亦要確保改善打工仔嘅待遇。可惜港府辦事不力，淨識卸膊，一味將問題拋畀僱主僱員自己搞掂，結果未見平衡勞資利益，反而引起勞資矛盾。
港府施政一向錯漏百出，一年到尾忙住補鑊。發展到今時今日，啲官僚畀人鬧得多，好似練成幾尺厚嘅面皮，再望望剩低嗰年幾任期，索性翹起雙手等收工，明明見到法例有漏洞都懶得補救。旨意佢哋保障勞工權益，不如相信豬乸會上樹！