政情：張文為華叔踢傷老婆
正所謂日有所思、夜有所夢，城市人生活壓力大，相信大家都試過將夢境當成真實，但唔知各位又有冇好似立法會議員張文光咁，因為發夢而得罪太座呢？張文自爆話早前試過發夢夢見恩師、已故教協原主席司徒華，喺夢裏佢為咗幫華叔開路，竟然喺現實中瞓瞓吓伸咗老婆一腳。
發夢齊往教協新址
喺張文嘅夢境裏面，佢同華叔搭緊巴士入元朗，齊齊去視察華叔一手創立嘅教協一個新會址。喺兩人落車行去會址期間，一直有講有笑，但突然條街走咗隻大野豬出嚟擋路，心急嘅張文即刻一手護住華叔，一腳伸開隻野豬，一時間身手不知幾敏捷，點知現實中佢就係一腳踢落老婆身上，即時畀太太搖醒「哦」佢一輪，好彩冇踢到太太周身瘀。
有時夢境會反映人嘅潛意識，唔通教協購買新會址唔順利，張文先夢到有野豬擋路？張文就嘆口氣話，依家仲未買到新會址，不過就唔方便透露詳情，話希望今年內可以完成交易，一圓華叔心願。