政情：葉劉促Rita劉公開病情
商務及經濟發展局局長劉吳惠蘭（Rita）上周被傳患上初期腸癌，要入院做切割手術，仲破天荒放大假放到四月十日，惹來患重病嘅疑團。
倡高官有病要申報
立法會經濟發展事務委員會尋日開會討論層壓式銷售前，唔少議員都關心Rita嘅病情，曾經做過問責高官、新民黨葉劉淑儀就覺得Rita要公開病情，因為高官有病唔應該係私隱，仲建議成立高官疾病申報機制，增加市民知情權，唔知政府會唔會採納呢？
委員會主席林健鋒忽然成為同Rita最接近嘅人，佢話會幫葉劉向當局反映意見，又指收到Rita嘅短訊，話自己「康復進度良好（Recovering well）」，但就冇回應有關私隱嘅問題。議員劉慧卿都認為Rita要向公眾交代，佢強調唔係因為「八卦」而想知Rita病成點，而係覺得Rita作為問責局長，身負為市民服務嘅重任，無端端請假咁耐，可能會影響工作，應該要同大家交代吓喎。