最低工資僱員及僱主指引尋日公布，但最具爭議性嘅飯鐘錢同有薪休息日就仍然未有清晰規定。勞工處處長卓永興話，如果僱主有能力，就應該主動提供飯鐘錢，因為咁可以令員工做得開心啲，但依家冇規定強制僱主畀飯鐘錢，所以都唔可以寫落指引度。
其實卓永興應該明白，現時冇規定嘅先係最低工資法例中最大嘅灰色地帶，如果所有問題都推畀勞資雙方自行解決，咁仲要政府制訂指引嚟做乜呢？
