政情：雷張慎佳退休忙交接
擔任防止虐待兒童會總幹事達廿八年嘅雷張慎佳嚟緊月底退休，兒童會尋日發通告指，將由原助理總幹事何愛珠接任。雷太為兒童會工作超過三十年，至今仍未因為退下火線而放慢腳步，佢尋日同我哋講，因為交接在即，依家幾乎日日都要開OT，希望將工作順利轉移，到下個月真正唔使返工，先再慢慢計劃吓佢嘅退休生活喎。
已經成為虐兒事務專家嘅雷太話，做咁多年，有時諗起要退休都好感觸，但覺得如果一個組織長期只由同一人領導，有礙組織成長，惟有放手將兒童會呢個親生BB交畀人。
或返兒童會做義工
退休後雷太希望先沉澱一下，再計劃去旅行或者返兒童會做義工，不過一切都未確定。但唯一肯定嘅係，近年為咗隨時應付傳媒就虐兒問題嘅查詢，雷太幾乎廿四小時開住電話，將來退咗休，相信電話同自己都可以真正咁休息吓嘞！