政情：田少「耕田」新界箍票
自由黨靈魂人物田北俊同周梁淑怡於○八年強勢出選立法會，最後卻鎩羽而歸，有指嗰次選舉失利，全因該黨唔少新界嘅鄉事票都被最大對手民建聯撬走，已退出該黨嘅鄉議局主席劉皇發更曾被指為「無間道」。據悉，早前高調「升呢」做該黨榮譽主席嘅田少已痛定思痛，總結經驗，認清形勢，最近更積極四出同各區鄉事會打定招呼，瞄準與民建聯唔多咬弦嘅北區重點出擊，勢要由區議會選舉開始箍票箍到立法會選舉！
民記被轟忘恩負義
北區向來都係鄉事派盤據之地，佢哋對政黨嘅「喜惡」足以影響選舉結果。不過，喺上屆立選傾巢而出幫民建聯、打到自由黨落花流水嘅北區鄉事派，喺嚟緊嘅選舉就未必會再繼續為民記抬轎嘞。據講，有鄉紳認為民記「打完齋唔要和尚」，利用完鄉事派轉個頭就乜都唔記得晒；亦有唔少人不滿民記次次攞完佢哋新界人嘅票，但係只係派出陳克勤同劉江華之流，永冇派出一個真正嘅新界人出選，令佢哋唔多高興喎。
有地區消息話，近期已有唔少有意出選嘅人士嚟搵班北區鄉事派打定招呼，其中田少及同樣有意出選新東嘅C18成員龐愛蘭亦有份，相反，民記主席譚耀宗卻慢人半拍，喺著名練馬師簡炳墀同民記北區區議員侯金林涉賄選被捕下先現身「拜訪」，誠意欠奉。唔少鄉紳都私下認為，與其過票畀飲水不思源嘅民記，不如轉為畀票自由黨，話唔定仲有着數，有人更揚言：「上屆田北俊輸幾千票咋嘛，我要過萬幾票畀佢有何難呀！」但佢哋聲言田少亦唔可以齋Talk，至少要喺當區開番個辦事處。
田少同我哋講，佢哋的確提早同大面積咁開拓新界東票源，一於由今年十一月投票嘅區議會選舉做起。該黨喺西貢、沙田、大埔同北區都會開設辦事處，四月會全部投入服務，由區議員及地區幹事坐陣，亦會繼續積極羅致地區人士入黨。唔講唔知，原來現時上水鄉事會主席兼北區區議會副主席侯志強都係自由黨嘅黨員之一。照各種形勢睇，睇怕民記以為自己穩袋嘅鄉事票，最後極有可能流向別人田嘞！