中環出更：藝院校舍命名 答謝善長
香港藝術中心創辦嘅香港藝術學院（筲箕灣）校舍雖然已使用兩年，尋日為咗致謝捐贈營運經費嘅善心企業，特別舉行校舍命名儀式，獲一眾政商界知名人士抽空撐場。藝術中心監督團主席包陪麗最開心，皆因除咗日籍老公渡伸一郎同囝囝Tommy現身支持，細妹包陪慧（Doreen）夫婦亦嚟撐場。Doreen致詞時講起校舍以媽媽包黃秀英命名時，一時感觸哽咽，仲眼濕濕，幾秒鐘都講唔到嘢，令到現場嘉賓十分感動，為活動增添幾分溫馨氣氛。
包陪慧憶媽媽眼濕濕
包氏姊妹係已故船王包玉剛嘅愛女，家族所屬嘅包玉剛基金一向對本港藝術發展十分支持。排行老四嘅Doreen代表基金致詞時，提起小時候媽媽教佢哋要創新，唔好有因循嘅心態，就忍唔住眼濕濕，事關媽媽喺咁保守嘅年代都放膽教佢哋要創新，佢至今諗起都感觸良多。
合和集團董事總經理胡文新都喺度，佢唔止有份贊助並獲命名一間設計工作室，仲有份湊大學院添！原來六年前學院將校舍搬遷到合和中心，佢特別喺租金上給予資助以示支持，直至兩年前學院獲政府批出筲箕灣現址搬出為止，難怪尋晚佢無論幾忙都要抽身嚟見證珍貴一刻。
行政會議成員夏佳理都以西九文化區管理局發展委員會主席身份出席，佢話小時候屋企好窮，所以冇特別學過樂器或者藝術，長大之後投身工作就更加冇機會學嘢。不過每年佢會陪奧地利籍嬌妻返外家，去到人文薈萃嘅歐洲，梗要欣賞一、兩場音樂會或戲劇，於是佢就漸漸成為西方音樂、話劇嘅愛好者。
莎莎國際太子女陳郭詩慧（Melody）同老公拍拖前來，佢哋有份贊助位於天台嘅露天藝廊，原來佢都學緊國畫，已堅持三年，平時最鍾意用牙刷沾上墨水做噴畫，但係好易整污糟間屋，所以索性喺廚房畫畫，連牆身都有佢嘅畫迹㗎！
卓妮