中環出更：梁高美懿陪老公賞7欖
香港國際七人欖球賽今日煞科，過去兩日吸引咗好多球迷入場觀賞，卓妮就喺首日賽事遇到恒生銀行副董事長兼行政總裁梁高美懿拖住老公入場睇波，非常恩愛。原來梁生當年喺新西蘭讀書，愛上欖球賽，但因為工作忙碌，所以唔可以年年捧場。雖然梁太無講支持邊隊球隊，但佢件風褸就寫上「New Zealand」（新西蘭），莫非佢兩公婆係新西蘭隊嘅擁躉？
彭沖帶外孫湊熱鬧
卓妮又喺大球場內遇到港協暨奧委會義務秘書長彭沖夫婦，佢哋仲帶埋四歲嘅外孫去湊熱鬧，場面好溫馨。彭沖係香港體育界猛人，對所有運動項目都好支持，加上年前香港欖球隊喺東亞運動會及亞運會都取得佳績，而且七人欖球賽知名度愈來愈高，可以話係華人社區少見嘅盛事，所以今年佢都要帶埋乖孫嚟捧場，感受現場熱鬧氣氛喎！
