房署敷衍 滲漏擾民六年

居於耀安邨耀謙樓的簡先生多年來因滲漏問題影響至居無寧日，原以為作為大業主的房署會妥善處理兼根治滲漏，可惜僅獲以「打針」方法「止咳」，問題非但未獲解決，滲漏範圍更不斷擴大，由大廳蔓延至廁所、睡房，「（房署）搵人就咁喺滲水個位鑽兩個窿，係咁意唧啲膠就算，愈整愈衰！」簡更不滿房署處理有欠積極，每次投訴後均需等一段時間才有人上門檢查，有時更只獲回覆「等吓啦」或「要排期」，令簡氣上心頭。

住戶不滿未積極跟進

耀安邨租戶服務辦事處發言人承認，○九年年中曾安排工程承辦商為上述單位進行防漏工程，其後未有再接獲住戶反映滲漏問題。發言人又稱，今年一月接獲本報查詢後，已再派員到單位進行檢查，但未有發現滲漏。

「有上嚟咁又點，都要徹底解決到問題先得。」簡直指辦事處未有積極跟進問題，要求房署徹底根治滲漏。

沙田區議員鄭則文直斥房署敷衍了事，「房署有好多專業人員，佢哋冇理由唔知打針治標唔治本！」鄭指根治滲漏必須找出滲水源頭，而非堵塞滲水位置了事，作為大業主的房署應該積極根治滲漏問題，否則便屬失職。

促全面檢查截斷源頭

驗樓師詹濟南解釋，「打針」即以高壓方式將類似樹脂的化學物質「打入」石屎內，目的為填塞裂縫，乃常見防漏方法，但不能徹底解決問題，「水係流動嘅，塞咗條罅，啲水就會流去其他範圍，喺第二條罅再滲過！」詹指倘裂紋過長，更需多次「打針」才能防止滲漏，「如果上面嗰層（業主）肯合作，就可以起晒個地板做防水工序，咁先係最徹底！」

「打針只係處理滲漏問題嘅其中一個辦法，亦只可以暫時性解決問題。」香港專業教育學院（摩理臣山）建造工程系系主任陳子明建議，房署除了檢查上層單位外，更應檢查大廈外牆及石屎質量，務求盡快截斷滲漏源頭。

記者 林綺淇