政情：大輝逛北京798尋潮物
喺北京舉行嘅全國政協會議尋日閉幕，臨走前，唔少名人趁機暢遊名勝。近年人氣熱爆嘅北京798藝術區成為熱辣辣之選，立法會議員兼港區政協委員林大輝都去咗尋寶。
大輝前日下午趁會議後空檔，一支公逛798。原來每次上京，佢都到此一遊，絕對熟晒地頭。798藝術氣息濃厚，係北京重要文化地標，嗰度畫廊林立，齋睇藝術展覽，逛時尚用品店及書店，足以消磨大半天，大輝左逛右逛，見到靚嘢就影低佢留念。眨吓眼逛咗三、四粒鐘。
臨走前，畀佢發現「潮物」，就係一條鑲滿閃令令鈕扣嘅皮手帶，盛惠十五元人仔，佢開心到買咗即時戴上手。大輝仲發現一位北京唱作歌手相當有才華，花二十蚊人仔買咗隻ＣＤ，返香港慢慢欣賞。