政情：黃傑龍時運高避過地震
敍福樓太子爺黃傑龍獲政府委任做最低工資委員會成員，喺政界嶄露頭角，人氣上升，連運氣指數都高埋，因為一個「運」字，避過日本東北大地震一劫。
上星期三，黃傑龍應邀啟程日本考察和牛製品，考察地有兩個選擇，一個係鹿兒島，另一個正係世紀大地震重災區仙台，最後考察團因想見識埋鹿兒島出產嘅黑毛豬，就係一念之間，令黃傑龍避過仙台一劫。星期六即係地震翌日天未光，黃傑龍同團友本打算取道羽田機場返港，但考慮到羽田機場情況混亂，臨時改往鹿兒島機場諗辦法，原來鹿兒島機場咁啱逢星期六有機飛上海，就係咁，黃傑龍前晚由上海轉機抵港。
黃傑龍今趟「走難記」仲有小插曲，佢星期六凌晨打長途電話返香港入境處求助，輾轉等到有入境處職員聽電話，佢表達希望港府代為安排從最近嘅福岡機場乘機返港，留低電話號碼，但入境處到尋日夜晚先至回覆跟進，黃傑龍話，好彩無等入境處幫手，唔係都唔知幾時先至返到香港。