政情：任亮憲與緋聞女友同場論政
公民黨同其餘十幾個團體尋日喺中環搞咗個集會，批評財政司司長曾俊華嘅史上最廢財政預算案，民主黨同選民力量呢兩個宿敵竟然都係獲邀之列，早排捲入涉嫌強姦案嘅「維園阿哥」任亮憲尋日都有到場，而同佢傳過緋聞嘅公民黨義工張可怡咁啱又嚟湊熱鬧喎，真係好睇過戲。
事發後一直封嘴嘅任亮憲尋日着粉紅同白間條衫到場，離遠已經見到佢；至於張可怡呢，一身綠色打扮，令佢分外出眾，加上佢姍姍來遲，一到場已經吸引在場人士目光。不過現場所見，佢兩位由始至終都冇交流，唔知係咪因為唔想再畀人講，定係再見不是朋友呢？
白鴿黨爆粗問候
活動上，當民主黨兩位立法會議員甘乃威同涂謹申發言時，選民力量班成員就企晒起身，背對住兩位議員，話自己不齒與對方為伍喎，結果搞到民主黨西貢區社區主任鍾恩緒大發脾氣兼講粗口，搞到要警察調停先收到科。
對於畀人用粗口問候，選民力量就話冇乜嘢所謂，仲叫記者問番成日叫人唔好講粗口嗰個民主黨立法會議員喎。