政情：泛民議員放飛機搞到流會
港區人大政協空群去咗北京出席「兩會」會議，為特區寫下臨時撥款動議首次不獲立法會通過嘅歷史。其實立法會議員放飛機唔開會時時都有，上個星期都有一次，搞到個會議因為唔夠法定人數而流會，今次放飛機嘅，全部都係泛民議員，不過留意嘅人唔多，唔會搞到好似建制派議員喺上星期三嘅立法會會議上咁，眾目睽睽做晒罪魁禍首。
《殘疾人士院舍條例草案》委員會會議原訂上周五朝早十點九開始，十二個委員當中，有六個答應會出席開會，點知最後有三人遲大到或甩底，搞到準時出席嘅民主黨黃成智、工聯會葉偉明同社福界張國柱三個議員你眼望我眼，等咗十五分鐘，結果都仲差一人先夠法定人數，即係點都未能達到委員會成員人數嘅三分之一，最後逼住宣布要流會。
私事大過天
甩底議員包括公民黨梁家傑、職工盟李卓人同社民連梁國雄（長毛），但三人異口同聲話唔係有心搞到流會。梁家傑話，當日臨時要上電視台嘅節目，同民建聯副主席兼行政會議成員劉江華辯論預算案，節目去到十一點，佢本身諗住做完節目飛車返立法會仲趕得切，點知有其他人同樣遲大到，佢返到立法會時已經係為時已晚。梁家傑對於流會都感到唔好意思，但強調預算案係大是大非、關乎全港市民嘅議題，畀佢揀多次，佢都係會揀去同劉江華辯論，寧願遲到。
同樣甩底嘅李卓人就話，開會嗰朝屋企突然有事，要留在家中處理小型工程，所以被迫缺席；長毛遲到嘅原因仲離奇，話係因為之前唔見咗身份證，當日要去人事登記辦事處進行補領手續，點知排咗成個鐘隊都未能完成，結果就搞到趕唔切。
三個人就係因為唔同嘅原因遲到甩底，唔知出席咗嘅同僚點諗呢？草案委員會主席黃成智知道後極為無奈。不過成智指委員會已經進入最後逐條審議階段，相信開少一次會都唔會有太大影響，預計草案可如期喺五月中交畀立法會大會進行表決。不過佢強調開會係議員責任，提醒大家以後都要開齊會喎！
其實喺議事堂嘅議員之間，日日都發生緊有口話人冇口話自己嘅情況，呢個可能係社會嘅縮影啦，不過尊貴嘅立法會議員無比普通人做人更嚴謹，更負責任囉。