中環耳目：容永祺心水餐包做早餐
全國政協委員容永祺喺銅鑼灣返工，幾乎每日都去禮頓道嘅丹麥餅店買麵包做早餐，佢最鍾意呢度嘅餐包加奶茶，就係咁嘅絕配，令佢每朝開工都精神爽利。
嫌肉餡太Heavy
容永祺係AIA資深區域總監，公司就喺銅鑼灣利園，佢返工時途經禮頓道，經常會吩咐司機喺丹麥餅店停一停，等佢可以買個包。可見食嘢唔使貴，最緊要啱心水。
丹麥餅店其貌不揚，但麵包店不可貌相，呢度嘅出品例如豬扒包同熱狗，都不知幾多捧場客，尤其佢附近有學校，放學時間就更擠擁。容永祺食早餐，麵包有肉類做餡太Heavy，餐包就啱啱好。餐包係一種較為傳統嘅麵包，容永祺唔怕清淡，話早上啱啱出爐，熱辣辣特別好味。