易小玲陳國柱前路茫茫
幸存不一定幸運。菲律賓「８‧23」慘劇，八名香港人質客死異鄉，從死亡旅巴檢回性命的易小玲及陳國柱，一同接受本報專訪。其中下顎重創的易小玲還鼓起勇氣，脫下口罩，讓記者看傷勢，不過，由慘劇至今半年，沒有一絲快樂，更想不到菲律賓政府涼薄到不派證人來港作供。經歷槍戰陰霾、殘障後遺症，他們現時更要面對無工作能力的困局，未來，一片灰暗。
「事發後一個月都有幻覺，見到門多薩企喺我面前，到依家，發夢仲見到好多死人、好多血、好多慘叫聲，我嘅生活無可能回復原狀！」右下顎嚴重受傷的易小玲，說話漏風，至今接受七次手術，受傷部位不似人形，她鼓起勇氣脫下口罩讓記者看傷勢，惟眼色慌張，怕會嚇怕記者。記者見她右下顎補上人造下巴，嘴根本談不上是嘴，無法合上，卅多顆牙齒只剩八隻，全栽在左邊口腔。她傷心說：「食嘢仲慘過老人家，只能食糊仔，除咗去醫院、接小朋友放學，其他時間唔敢出街食飯。我接受唔到毀容事實，唯一希望係除口罩見人。」
易：要20萬手術費
慘劇前，她任職酒樓及售貨員，但毀容令她難以再從事服務業，靠慈善團體的十多萬捐款應急。沒料捐款令她無法申領綜援：「要申請綜援，條件係用晒啲善款，不過往後的手術費要自己負擔，醫生話要儲廿萬手術費，返唔到工，之後生活都唔知點！」
陳：轉行唔知做乜
陳國柱在槍戰中，右手嚴重受傷，斷了四條筋及兩條神經線，他說：「我依家訓練緊左手揸筷子，但係仍然未寫到字。」他每月得一千四百九十元的傷殘金，但這筆款項根本幫不上忙：「我本來同朋友開一間車房，要落手落腳做，出事後都做唔到，無出糧，遲啲考慮退出。轉行？都唔知可以做到咩？」
兩人到死因庭作供，卻換來失望。陳國柱說：「估唔到菲律賓政府咁涼薄！」而易小玲至今僅收過一封由菲律賓政府寄出的道歉信，但內容充滿官腔，她認為不能接受。
記者 李嘉行