彭定康獲推薦出任英國廣播公司（BBC）信託主席單嘢，喺英國政界繼續惹起爭議。佢日前出席英國下議院一個委員會會議時，不但說話自相矛盾，更畀人寸佢唔熟BBC嘅電視同電台製作，反映佢喺搵工面試前都冇做足準備功課。
早前在野工黨質疑彭定康身為前保守黨黨魁，同現任保守黨自民黨聯合政府關係密切，擔心佢出任主席會令本應獨立運作嘅BBC淪為政府喉舌，要求佢退黨以示中立。當地時間星期四下議院嘅文化、媒體及體育委員會會議舉行時，肥彭辯稱自己已經主動放棄咗多項次要公職，否認出掌BBC係幫保守黨做打手，堅持唔會退黨，但佢同時又承諾辭任保守黨上議院黨鞭職務，說法相當矛盾。
雖然該委員會最後仍支持有關任命，但就喺報告內寸咗肥彭幾句，話佢為咗BBC份工而放棄其他外界利益，根本就好應分嘅，又指肥彭對BBC電視同電台製作認識好少，令委員會「感到驚訝」（surprised）。估計肥彭五月正式上任後，有關佢同BBC嘅爭議仍會沒完沒了。