中環出更：馬場撐港澳盃 四太心情靚
賭王何鴻燊家族爭產風波圓滿結束，四太梁安琪在澳博嘅地位穩如泰山，總之皆大歡喜。四太尋日以勁靚嘅心情現身沙田馬場，為過江出戰港澳盃嘅澳門馬匹打氣。難得見到四太，卓妮當然要問吓佢係咪滿意何家財產分配啦，點知四太全程以巧妙伎倆回應有關問題，仲好幽默同卓妮開玩笑，印證四太處變不驚同智慧無限。
四太抵達馬場時，即被大家追問財產分配一事，佢就話乜嘢都唔講住，要專心睇馬，直言「依家最緊要係澳門（馬匹）贏！」賽後四太再被追問財產分配一事，佢就順應大家回應話︰「無咩特別，大家睇到個結局，同一個和諧家庭分配，最緊要今後做好公司工作。」問四太對個結局滿唔滿意，佢笑笑口話︰「我答咗你嘅啦！」好滿意？「我答咗你啦，我無講呀，你講㗎咋！」
周松崗大董現身 亦想過馬主癮
被問及對財產分配協議滿唔滿意，向來充滿智慧嘅四太想一想之後話︰「唔滿意……跑第三，麻麻哋啦，當然最好跑得一，希望下次澳門贏番。」原來四太係講緊澳門馬匹「鴻運駿駒」喺港澳盃賽事中只跑第三名，無緣拉頭馬。再問番四太係咪滿意股權分配？佢話：「今日只講港澳盃，其他唔講，唔好搞亂思維。」之後就笑容滿臉登車離去。
尋日除咗四太搶晒鏡之外，馬場入面仲有一粒耀眼新星，就係首次以大董身份入馬場嘅港鐵行政總裁周松崗。周大董話，馬會主席施文信兩星期前突然問佢有無興趣做大董，周大董諗咗一陣，最後被馬會呢個慈善機構打動咗。雖然周大董已屆退休之齡，但佢仲有心有力，仲應承退休後唔會只係吃喝玩樂，會繼續擔任公職服務社會，話唔定會養番匹馬過吓馬主癮喎！
卓妮