通脹猛於虎，衣食住行樣樣貴。子女讀緊書嘅家長，除咗憂柴憂米，仲要憂多一樣，憂教科書年年加價，唔係講笑，係咁加落去，貧困學生隨時有學返冇書讀。
香港教科書貴到離譜，係人都知，究竟貴成點呢？有家長訴苦話，幫三名子女買齊成套教科書，就要一萬二千蚊，問你點頂。弊在港府關人個關，從來唔肯諗辦法幫家長減輕負擔，就算提出所謂應對措施，亦係唔湯唔水，搞到一鑊泡。呢，好似課本同教材分拆咁，教育局堅持今年內落實，副局長陳維安前日仲叻唔切咁話，已經同兩大出版商達成共識，九月新學年開始可以將課本同教材分拆發售喎。點知話口未完，就畀人踢爆原來係「作大」。
出版商回應話，同當局只係傾過落實細節，幾時推行並冇共識。教育局後來亦承認，雙方只討論過落實分拆定價嘅安排。咁即係話，課本減唔減到價、幾時減仲係未知之數，當局今鋪直頭瘀到痹。
班高官真係愈來愈廢，中學減班風波仲未過，家陣又嚟多一劑「大石砸死蟹」嘅醜聞，未有共識就耍小聰明玩「既成事實」，卒之衰多兩錢。陳維安呢頭承認無法控制書商定價，今年教科書調整幅度難以估計，嗰頭又否認分拆教材措施「交白卷」，仲死撐話已經創造咗減價空間喎，簡直九唔搭八，不知所謂。
正所謂，殺頭生意有人做，蝕本生意冇人做。以前書商為招攬生意，向學校提供各種「着數」，然後將呢筆隱性開支同自己嘅利潤綑綁喺書價入面，要家長埋單。家陣課本同教材分拆，書商慳番一筆隱性開支，教材可以賤賣，甚至免費送畀學校，教師唔使另外編寫教材，梗係歡迎啦。
之不過，教師用乜教材，學生就要用同一書商出嘅課本。羊毛出在羊身上，書商將成本同利潤轉嫁畀家長，課本售價隨時不減反加，當局亦冇佢哋符。慳番教材嘅錢，分分鐘唔夠冚課本嘅加幅，因減得加，真係盞搞。
話時話，教科書超貴嘅問題年年困擾家長，港府唔係無嘢可做，而係闊佬懶理，唔肯做嘢啫。其實，當局大可以學其他國家咁，由政府負責統籌教科書嘅編寫、印刷同銷售，咁家長咪唔使年年畀書商撳住搶囉。
連內地官員都識講，再苦不能苦孩子，再窮不能窮教育喇。計功夫茶話齋，港府庫房嚴重水浸，窮到只剩下錢，只要撥少少資源解決教科書超貴呢個老大難問題，為同學和家長做番件實事，總好過亂咁派錢搞到天怒人怨喇。