政情：李鋈麟搞六千蚊基金
政府向市民大派六千元，至今點派都仲未有聲氣，但普遍市民已研究緊點使筆錢，有名人話食晒佢或捐去慈善機構，但亦有另類做法。好似東華三院總理李鋈麟同胞弟、博愛醫院總理李鋈發，就打算成立一個小型家庭基金，集合晒李家成員嘅六千蚊，幫助年輕人實現夢想，據講現時已經有十幾人參加，金額高達十萬元，但未講申請方法及金額上限。
早幾日李鋈發出席圓玄學院及博愛醫院合辦嘅長者春茗時，話相信距離政府派發六千蚊仲有一段時間，所以佢同哥哥會繼續搵多啲人捐錢，谷大個善款數字，希望可以幫到年輕人實現夢想。無獨有偶，今年博愛醫院暑假會搞個打機活動，善款會用作青少年服務，將於四月接任主席嘅湯修齊話，佢平時都有同仔女一齊打機親子樂，所以佢話到時都會帶埋仔女去玩喎。