政情：潘佩璆教子兩文三語
近年唔少老闆都批評畢業生語文水準低落，好多父母為子女前途着想，都不斷幫子女惡補兩文三語。工聯會勞工界立法會議員潘佩璆當年都有呢種煩惱，但因為佢同太太搵啱咗教仔良方，令到兩個仔嘅語文能力相當好，現時一個係醫生，一個係律師，究竟佢有乜辦法教到啲仔咁叻呢？
潘佩璆係聯合醫院精神科顧問醫生，九十年代曾經舉家去新西蘭及英國工作，佢話當年已經意識到兩文三語好重要，但由於身處外地，點樣令兩個仔學好普通話呢？潘醫生就諗到，每晚同兩個仔帶寵物散步時，趁機同佢哋用普通話對答，每次講半小時，久而久之，兩個仔都講到一口流利普通話。
為咗令兩個竹昇仔學好中文，潘醫生仲鼓勵兩個仔每日用中文寫日記，而且仲要幫手用中文回信畀親友，至今兩文三語已達一流水準。唔單止咁，現時潘醫生同兩個仔傾偈仍然用普通話，佢哋同媽媽溝通就用廣東話，兩兄弟傾偈就講英文，一家人食飯變咗多聲道，認真搞笑。