政情：政府委公職偏袒民記？
政府旗下有好多個基金，資助唔同範疇嘅活動同服務，好似社區投資共享基金委員會尋日又有一班新成員任命，一睇之下有幾個名熟口熟面，包括廉政專員湯顯明嘅女友、前入境處助理處長陳詠梅、香港迪士尼樂園行政總裁金民豪，仲有被視為民建聯新星嘅深水埗區議員鄭泳舜等。
社區投資共享基金過去已有民建聯離島區議會副主席周轉香，點知現時仲委任多個鄭泳舜，委員會入面部分更係親民建聯嘅成員，喺審批項目撥款時真係聲都大啲。不過，鄭泳舜話基金制度有規有矩，而且佢只希望同其他委員分享服務基層嘅經驗，相信對處理涉及基層撥款申請會有幫助。
另一獲委任嘅陳詠梅，退休無幾耐，已有新公職等緊佢，唔通政府怕佢唔習慣退休生活？至於金民豪，佢都算唔話得，事關香港迪士尼搞咁多年先有少少起色，希望佢唔會因為新公職而分身不暇啦。
今次獲委任嘅仲有一位商界人士，就係鴻福堂集團執行董事司徒永富，睇嚟政府都幾重視商界嘅意見喎。