政情：建制派擬圍「泛」救「曾」
「史上最廢」預算案引發萬人上街怒吼財爺鬍鬚曾下台，民主黨更計劃喺本月三十日向鬍鬚曾提出不信任動議。建制派為保鬍鬚曾面子，出陰招齊齊喺同一日提出動議辯論，「溝淡」泛民主派抽中動議嘅機會。有建制派成員爆料話，今次「圍泛救曾」行動係由特首辦主導，大家只係聽指令行事。
特首辦搵議員幫手
根據立法會秘書處嘅數字，已經有二十名、即係三分一嘅議員要求於本月三十日大會上提出動議辯論，大部分都係建制派議員，包括旅遊界謝偉俊討論增加旅遊基建、工聯會葉偉明討論標準工時、體育、演藝、文化及出版界議員霍震霆都有意討論體育政策，而排隊嘅泛民議員就只有五人。
葉偉明同謝偉俊都話，每年都係差唔多時間提出動議辯論，否認要同民主黨對撼。不過，有唔肯公開身份嘅建制派成員承認，近日收過特首辦電話，要求佢哋提出動議辯論，務求減低泛民抽中動議嘅機會，確保鬍鬚曾唔需要喺預算案表決前就要面對呢場政治危機。
每次大會只容許兩個議員提出動議辯論，如果排隊人數超標，就要秘書處抽籤決定，同一立法年度冇提出過動議辯論嘅議員會獲優先分配，到底邊兩個係幸運兒，下周一抽籤自有分曉。
