政情：雙曾毒招變玩火自焚

行禮如儀嘅臨時撥款議案表決，竟然演變成開埠以來首次被否決嘅戲劇性結局，對特區管治，係一套災難片，對普羅市民嚟講，就更加係一齣愈睇愈谷氣嘅無厘頭式爛片。不過，對部分有份被捲入事件漩渦嘅建制派議員嚟講，絕對有理由懷疑呢齣係港府自製嘅政治大龍鳳。

失票唔求救

首先，當日港府並無派俗稱狗仔隊嘅點票隊伍到立會把守，完全唔似大戰在即嘅狀況。其次，撥款辯論持續三小時，政府新聞處必定有人透過電視直播全程監控情況，港府「失票」，無理由無人察覺。不過，綜合當日因事離開咗議事堂嘅建制派議員口供，港府由始至終無打出過一個「求救」電話，事態相當可疑。

數票非箍票

建制派圈子仲流傳，表決前兩日，特首辦高層曾致電某建制派議員，探問能否出席投票，該議員仲以為港府施展拉票箍票攻勢，點知對方聽完自己話因離境公幹而無法出席後，即刻收線，姿態似「數票」而非「箍票」，反映港府最高層蓄意設局，專登令臨時撥款被否決。

有建制派議員笑稱，臨時撥款遭否決後，立法會辯論兩項由議員提出無法律約束力嘅議案：「建立中港溝通機制」及「改革醫管局」，兩條議案咁弱雞，建制派都收到當局嘅箍票電話啦，反而涉及六百億元臨時撥款，港府就唔嗲唔吊，孭鑊嘅財經事務及庫務局局長陳家強，就話被人叫「傻強」啫，唔通成個政府都係懵嘅！

所以，講唔埋根本係煲呔曾為解鬍鬚曾被全城圍插嘅窘境，索性出條撥款觸礁苦肉計，令泛民成眾矢之的，只係佢千算萬算，算唔到社會群情洶湧，鬧爆政府「無銀用」，煲呔曾害人終害己，活該！