中環出更：自由黨青年團蒲吧論政
年輕人論政，表達形式及關注嘅議題多數同資深政客有啲唔同，好似啱啱喺年初成立嘅自由黨青年團，舉行每兩月一度嘅黨友聚會，就選擇喺中環蘭桂坊一間酒吧舉行，形式夠晒新潮。青年團本周三舉行首次聚會，共有五十幾位青年黨友參加，除咗有「自由黨鍾嘉欣」之稱嘅靚女歐銘思外，連「黨花」方亮瑜都在場，令大家論政都醒神好多。
邱誠武放飛機
青年團主席李梓敬話，佢哋選擇喺酒吧聚會，主要希望可以喺輕鬆環境下，讓大家盡情論政，就社會關注嘅熱門議題凝聚共識。佢哋仲構思邀請港府嘅副局長及政治助理到場分享從政經驗，彼此交流聯誼，總之點子唔少。據講青年團早前曾邀請運輸及房屋局副局長邱誠武出席首次聚會，當初邱誠武亦無拒絕，但結果連影都無埋，顯露官僚一貫作風。
由於當晚無官員到場，焦點自然落於歐銘思同方亮瑜兩位靚女身上。大家摸住酒杯底講起歐銘思點解有「自由黨鍾嘉欣」稱號，原來始作俑者係該黨港島支部主席兼東區區議員邵家輝，難怪歐銘思當面詐嬌話多得邵家輝唔少，仲反駁話：「我邊度似鍾嘉欣啫！」不過，既然靚女黨員咁有號召力，李梓敬都話嚟緊第一要務係吸引多啲女黨員喎！
眾多青年黨員之中，以李梓敬較為活躍，經常現身於公開論壇，論政有紋有路，佢仲打算參加年底區議會選舉添，相信可為近年處於沉寂嘅自由黨帶來一股新動力。