中環出更：白韞六唔驚地震照遊日
日本東北發生8.9級大地震，掀起日本七年來最嚴重海嘯。香港人最愛遊日本，咁震法，多少令人膽戰心驚，但入境處處長白韞六就話一啲都未驚過，拍心口照去日本玩！
保良局尋晚舉行周年慈善餐舞會，喺君悅大排筵席，除一眾董事局成員外，嘉賓冠蓋雲集。返多兩個禮拜就退休嘅白Sir同太太拍拖到場，佢心情勁靚，大爆已度好退休節目，首站係暢遊日本，連機票都訂埋。
日本災情「立立亂」，見慣風浪嘅白Sir話唔會改行程，四月中照原定計劃出發，希望日本盡快完成救災工作。白太都話唔驚，笑言終於等到老公退休，陪佢手牽手環遊世界，所以唔會咁輕易放棄每一個旅行機會。遊完日本，兩公婆仲會暢遊其他國家，難怪白太好風騷，叫卓妮恭喜佢喎。
保良籌款撐足球發展
尋晚籌款晚宴有好多善長慷慨贊助，當中包括籌委會主席暨保良局副主席龐盧淑燕率先捐款擔任鑽石贊助，仲有好多嘉賓捐贈拍賣品及禮品，例如中國四川畫家王亥嘅油畫大作、QEELIN贊助之金Wulu漸變寶石鏈墜及18K黃金頸鏈等。保良局主席呂鈞堯話，該局去年為配合政府提倡本地足球發展，率先成立「保良局足球發展基金」，尋晚所籌得嘅善款，將全數撥入發展基金。
卓妮