「潮物少女」赴美部署飲「頭啖湯」
【本報訊】iPad2今日在美國公開發售，本港一名九十後「潮物少女」部署詳細計劃及航班行程飲熱炒「頭啖湯」，一周內兩度赴美聯絡「排隊黨」及提貨，挾近五十部iPad2即日返港，整批售予內地炒家套近雙倍現金，旋再飛美提取第二批iPad2回港炒賣，兩轉港美行預計盈利廿萬元。該潮物少女指炒潮物不能長遠，因現時本港水貨市場競爭劇烈，近乎無利可圖，正計劃返內地開設潮物商店，另闢一個水貨新天地。
現年廿歲的Helene，自中二開始已懂得將本港潮流雜誌寄往外國搵外快，當時月賺二、三千元「零用錢」。炒貨念頭源自「貪慕虛榮」，嘆說當時喜歡追明星、追名牌但無錢，只好絞盡腦汁想辦法。「我突然諗到外國啲後生仔應該同我一樣，就將啲雜誌放上網度寄賣，點知一搞就掂咗。」當時一本在港售十元的雜誌，在美國可售十元美金，幾近是八倍的回報。
望一周內賺20萬元
這數年Helene再緊貼潮流，由炒波鞋到日本服飾，再到首辦公仔，為她帶來近廿萬元的利潤。○八年看中iPhone3G熱潮，年輕人會熱捧，於是親自飛往美國獲介紹下認識當地「排隊黨」，一口氣購入五十多部iPhone3G，回港後轉售即賺逾十萬元，成為人生中賺得最多一次的炒賣。其後，iPhone4、第一代iPad等都照炒賺得數十萬元。今次iPad2為她製造賺錢機會，Helene數天前已親身赴美，準備帶數十部回港交貨，套現後再赴美，希望在一周內炒過百部iPad2賺近廿萬港元。
Helene看好內地市場，計劃赴內地開設「潮物水貨店」，「所有蘋果嘅產品已經係潮流象徵，內地仲變成面子象徵，總之我愈快有，就愈有面，我好多客都係咁，唔係點會出到萬五蚊人民幣去買一部iPhone4呀！」