經常都話香港出生率極低，搞到學校唔係殺校就係縮班，其中一個主要原因係冇勇氣生仔。喂，香港生活環境咁多問題，淨係樓價貴到全球第一呢家嘢已經頭痛到爆啦，有資格為人父母者點忍心將無辜辜嘅小生命帶到呢個殘酷世界呀！
如果你相信投胎輪迴，香港出生率極低即係表示大量無主孤魂冇機會「移民來港」。換個角度嚟睇，既然成年人冇勇氣生仔，自己又會唔會選擇「移民離港」呢？答案係會嘅，無他嘅，良禽擇木而棲，外國好多地方嘅生活環境遠勝香港吖嘛，鬼叫你回歸之後所有施政都乏善足陳咩，今次連派錢都派到天怒人怨，自然令人心思思離家出走開拓美麗新世界。
有一家嘢叫做此消彼長，香港自己唔生性，變相增加外國嘅吸引力。好似香港嘅長期競爭對手新加坡咁吖，管治水平邊有港產官僚咁丟人現眼㗎，最低限度唔會出現臨時撥款議案被否決而出現「冇銀用」嘅尷尬場面。新加坡招攬人才真係不遺餘力㗎，對於精英移民提供各方各面嘅優惠或者津貼。研究人口政策嘅香港大學社會工作及社會行政學系教授葉兆輝就話嘞：「今年二十六個應屆碩士畢業生，有五個就被新加坡撬走咗！」
至於加拿大以及澳洲等等先進國家咯喎，當然係香港人移民嘅熱門選擇啦。人哋去公立醫院睇醫生，唔會好似香港咁「冇錢冇藥食」，亦都唔會排期等足幾個月甚至幾年，有一樣嘢最令香港嚮往嘅係，外國住嘅係有前後花園嘅獨立屋，相同價錢喺香港只可以畀你住到一間發水豆腐膶單位咋！
講咗咁耐，功夫茶無非想指出一點，政府失職萬事空，管治班子瓣瓣唔掂吖嘛，世界各地就會將香港嘅精英人才搶走。香港人才流失會有乜嘢後果呢？邊緣化囉，凋零化囉，廢柴化囉！
有人可能會話，香港都有類似招攬人才嘅機制吖，乜鬼嘢優才計劃呀，乜鬼嘢投資移民呀。唉，嘥氣啦，所謂優才計劃等於為內地明星提供旅行護照，所謂投資移民等於為內地大款提供炒樓炒股機會，冇人真係落地生根為香港服務㗎。
講番臨時撥款議案被否決吖，之所以會出現呢一壇嚇死街坊嘅官場怪事，罪魁禍首當然係不得人心嘅財爺曾俊華，其次就係外號「傻強」嘅財經事務及庫務局局長陳家強懵到上心口，明知唔夠票數通過，竟然戇居居唔去拉票坐以待斃。你話吖，見到咁廢柴化嘅官老爺，精英人才唔鳥獸散至奇！