港府最近多災多難，「史上最廢」預算案引爆嘅炸彈爆唔停，連政府臨時撥款議案都落得觸礁收場，簡直係倒瀉籮蟹。不過，身為港府「溫巴吐」嘅政務司司長唐英年就闊佬懶理，由本周二休假到十三日先至返工，仲聽聞佢條條fing到約會民主黨全數立法會議員同中委，今晚上佢官邸共進晚餐，風花雪月飲紅酒，真係港府大難臨頭佢風流，實屬不幸。
不過，睇嚟唐唐餐風流晚宴要改期嘞，事關前日泛民玩突襲令港府嘅臨時撥款議案遭否決，民主黨同港府關係弄僵，諗住兩軍交戰，不談風月，呢個時候同唐唐食飯，面左左場面尷尬少不免，搞唔好仲隨時惹人揣測有枱底交易添，於是臨時決定送個大檸檬畀唐唐食。
民主黨主席何俊仁證實，費事餐飯背脊骨落，已經主動通知唐唐取消約會。
如果唐唐以為自己可以喺呢場預算案風波中置身事外，實在太天真嘞，正所謂「皮之不存，毛將焉附」？民主黨唔領情食呢餐飯，話唔定就係向佢開戰嘅先兆呀！