新民黨嘅顧問團中，有個另類星級人馬，就係憑烹飪節目《Yan Can Cook》成為西方人眼中中國菜代表人物嘅甄文達，可惜佢長住美國，連今年初嘅創黨儀式都無現身助興，否則當日可能多咗主婦fans捧場都未定。不過，阿Yan近日路過香江，幾忙都抽時間搞場講座，同黨員分享個人嘅宣傳推廣及管理哲學，如果係阿Yan嘅fans就密切留意喇！
至於新民黨主席葉劉淑儀同阿Yan點樣相識，葉劉就話，年前留洋美國史丹福大學時，經常一路玩健身，一路睇《Yan Can Cook》節目，算係阿Yan半個fans，幾個月前才透過朋友互相結識。今次偶像一場來到，葉劉就盡地主之誼請阿Yan去食飯洗塵，仲親手補送新民黨黨徽襟章及個人嘅中英文著作，阿Yan興致勃勃翻閱葉劉嘅大作，唔知兩人會否擦出火花，搞番場烹飪論政嘅節目呢？