政情：彤叔捐8500萬撐清華醫學院
香港唔少富豪好重視教育，近年中港交流頻繁，班富豪除咗捐錢畀香港嘅大學之外，仲好興捐錢返內地嘅大學，目的不外乎係支持內地大學嘅科研工作，等國家更加強盛。人稱「彤叔」嘅新世界集團主席鄭裕彤，最近就透過旗下周大福慈善基金捐出八千五百萬人民幣，予北京清華大學醫學院興建醫學樓，尋日仲搞咗個奠基儀式添！
純官出席奠基儀式
彤叔個大仔、新世界發展董事總經理鄭家純（純官），現時正身處北京出席政協會議，尋日佢就抽空出席呢個奠基儀式。純官話，周大福慈善基金一直都以「取諸社會、用諸社會」為宗旨，而且好重視為國家培養人才及專才，捐款興建醫學樓就更加係代表咗佢哋支持國家醫學研究嘅決心。
據講呢座命名為「鄭裕彤醫學樓」嘅建築物位於清華大學校園西部，更加係生命醫學研究中心嘅醫學教學中心，成個項目規劃建築面積接近一萬八千平方米，大樓共有六層，兩層喺地下、四層喺地上，一聽就知道工程一啲都唔嘢小啦，落成啟用後將會完善清華大學醫學院教學及科研環境。