政情：泛民想鬍鬚曾「助選」
「史上最廢」預算案成為港府史上最具殺傷力嘅催命符，現時全城盯實財爺鬍鬚曾，睇佢幾時人頭落地、腳痛落台，民主黨驚佢唔死，打多一槍，提不信任動議，令本已五癆七傷嘅鬍鬚曾傷勢更重，奄奄一息。不過，香江政治從來弔詭，據聞泛民之中，好多人唔想見鬍鬚曾政途就此終結，想佢捱多一年半載，點解？因為鬍鬚曾已成全城喊打嘅民意大沙包，有利泛民搶攻年底區議會選舉囉。正因為咁，建制派亦不滿鬍鬚曾變相幫泛民製造政治炸彈，話唔定喺兩會期間打小報告篤死鬍鬚曾。
泛民有人想吊住鬍鬚曾條命，有迹可尋。上星期日泛民發動反對「短視預算案」遊行，一萬五千人怒吼，要求鬍鬚曾落台，其實絕非泛民計劃之內，甚至可以話非泛民所想嘅結果。消息話，遊行前夕，民主派商討遊行口號，已經一度研究係咪加入要求鬍鬚曾落台嘅口號，結果意見紛紜，幾經協商，最終敲定箭頭集中射向預算案，對鬍鬚曾嘅落手則點到即止。點知遊行當日群情洶湧，示威者自發高叫鬍鬚曾落台，泛民先至被迫附和。
泛民唔係同鬍鬚曾有親，點解要暗中保護鬍鬚曾？理由好簡單，咪係唔想鬍鬚曾咁快就一命嗚呼囉。區議會選舉仲有八個月就殺到，鬍鬚曾現時係整個港府最乞市民憎嘅官員，亦即係民主派代市民出氣嘅大沙包，拳拳到肉，打得愈狠，市民愈開心，只要鬍鬚曾繼續留喺港府裏面獻世，年底區議會選舉泛民就有藉口鬧爆港府，喺全城倒曾效應下，選票滾滾來呀！
送「彈藥」惹建制派不滿
反而，如果半個月後，鬍鬚曾真係鞠躬落台，新人接棒，根據過往經驗，接任人一般享有短則數月，長則一年嘅政治「蜜月期」，到時市民心軟，輿論鬆章，泛民呢個反對派角色，要為選戰造勢就困難得多囉。所以，泛民根本唔想鬍鬚曾咁快玩完，就算民主黨提不信任動議，都係因為日前泛民同鬍鬚曾見面，鬍鬚曾堅拒向泛民讓步，民主黨先至騎虎難下唔提動議唔得。
不過，泛民心底裏唔想鬍鬚曾死於中秋之前，唔代表鬍鬚曾就可以捱到過清明，據聞建制派對鬍鬚曾相當不滿，直指佢自製預算案政治炸彈，炸死自己之餘，仲殃及建制派，無形中為民主派搶攻區選送上大批彈藥，依家北京開緊人大、政協「兩會」，建制派可能已經密集式向中央打鬍鬚曾小報告，中央隨時早過泛民叫鬍鬚曾落台。