中環出更：李妮花六位數買翡翠耳環
珍貴翡翠，近年喺拍賣會價值與日俱增，極受內地豪客追捧，下月就任職博愛醫院副主席嘅李妮（Lily）三年前迷上收藏翡翠，穿梭大小拍賣會競投心頭好，尋日趁會展舉行貿發局國際珠寶展，豪花六位數字，購入一對雕工精巧嘅翡翠耳環。
逛珠寶展尋心頭好
卓妮尋日喺銅鑼灣時代廣場撞見Lily睇化妝展，原來佢啱啱同老公逛完珠寶展，Lily睇中一對雙環設計翡翠鑽石耳環，色澤翠綠有光，雙環緊扣，中間並冇駁口位，雕刻難到極。Lily望住對耳環唔捨得走，老公見佢咁鍾意，豪氣地碌卡找數，Lily仲開心到即買即戴。
Lily手上仲有一顆如欖核般大嘅翡翠戒指，原來呢隻係佢第一顆翡翠首飾，三年前喺拍賣會上投得，當年做價六位數字，如今已升值一百五十巴仙。何解鍾情翡翠？Lily話：「我非常偏愛綠色，翡翠予人一種歷練感覺，散發貴氣光芒。」佢笑言，如果眼前有鑽石同翡翠，要二選其一的話，佢會毫不猶豫揀翡翠喎。
