欠書追款圖館拖足10年

「十年前嘅事，我點會記得有冇借過呢本書？圖書館講咩都得㗎啦！」阿怡（化名）早前接獲圖書館職員來電，指阿怡於二○○○年借閱的一本圖書尚未歸還，而○一年又再逾期歸還另一本圖書，須繳交重置費用及罰款共七十二元。阿怡坦言對欠書未還一事全無印象，遭追收欠債更感莫名其妙。

事隔多年死無對證

阿珍（化名）的兒子同樣突然被追繳逾三百多元罰款，「我哋係搬過屋，但係電話一直都冇改，有乜理由八年後先寄信嚟追？」阿珍曾向康文署查詢，獲回覆○二年五月館方曾發信追繳欠款，卻被退回。最近才向個人資料私隱專員及入境事務處申請更新其子的個人資料，故再次發信追繳欠款。

無獨有偶，謝先生亦接獲康文署信件要求交四年前欠款，向圖書館查詢後，竟指館方曾兩度發出信件惟均被「打回頭」，直至今年才成功寄出，「我住喺度已經廿幾年，我連電話都冇改過，佢哋又話冇晒以前啲信，咁即係死無對證！」

康文署發言人指出，圖書館一般會以信件追繳罰款，如因讀者搬家或其他原因退件，圖書館會向個人資料私隱專員徵求同意，要求入境處協助更新讀者資料再度發信，但承認職員亦可透過電話聯絡讀者。

發言人又重申循法律途徑追討欠款的期限雖為六年，但圖書館仍有責任向讀者追討，所有欠款紀錄會一直儲存於電腦系統，直至清繳完畢。

議員直斥實在離譜

「十年後先再追，實在太離譜！」立法會民政事務委員會委員王國興認為，市民欠交罰款雖有責任清繳，但事件反映圖書館行政效率偏低，「佢哋自己都講可以用電話啦，啲信彈回頭咪用電話追囉，做乜要搞到咁複雜？」

另一委員陳淑莊亦認為，圖書館如遇退件應立即嘗試使用電話作聯絡，避免欠款一拖再拖。

陳又建議圖書館應將被退回的信件保留及存檔，「咁樣先可以證明真係嘗試過搵佢哋，唔係呢會搞到啲讀者好疑惑，變到好似死無對證咁！」

記者 林永發