前線醫護人員做到冇停手，七個蓋冚十個樽，呢個已經係非常嚴峻嘅問題，隨時危害病人利益，話唔定又會打錯針、輸錯血、餵錯藥諸如此類。所以咯喎，忍無可忍嘅公共醫療醫生協會已經向醫管局提出六大訴求，包括加快晉升速度、增設額外當值津貼、公開人手安排等等，若果情況冇改善不排除工業行動咁話。
哈，當你見到醫護人員怒火朝天，幾大巨頭空群而出周圍撲火，呢個醫管局主席胡定旭去商討紓緩人手流失對策，嗰個食衞局局長周一嶽去巡視醫院了解苦況，你以為醫療高官終於識驚啦。點不知原來唔係，一切都係假象，醫管局繼續肥上瘦下，竟然寧願花錢為退休高層續任或者「無中生有」開設新職位，都唔願意投放資源改善人手同工作環境。換言之，醫管局荒謬透頂，明益自己友，懶理苦命人。
呢嗱嗱嗱，好似港島西聯網前總監賴福明咁吖，原本喺○六年退休，不過兩次續任至前年，去年更加被委任為高級顧問（醫療事務），負責協助推行醫院認證計劃。呢個係受薪職位嚟㗎，居然冇公開招聘。
另一單個案仲誇張，○七年時任策略發展總監嘅黃譚智媛退休，隨即被委任為綜合西醫服務顧問，負責中醫服務培訓及科研發展。大家必須留意一點，呢個職位係新設嘅，外界質疑完全係為黃譚智媛度身訂造，而且從來冇公開招聘，絕對有理由相信係明益自己友。
其他類似情況未講完㗎，不過為免大家覺得太累贅，所以姑且按下不表。
好嘞，大家評評理，既然前線醫護人員做到一頭煙，醫管局唔去增聘人手解決問題，反而動用公帑開設新職位「孝敬」退休高層，係咪混帳到一塌糊塗吖？成日都話香港醫療系統接近崩潰邊緣，醫護人員逃亡潮一次又一次出現，再係咁搞法神仙都難救啦！
話香港醫療系統接近崩潰邊緣唔係靠嚇㗎，大家應該記得冇耐之前有一位醫生懷疑過度操勞不支暈倒，事件反映人手真係短缺得好交關。喂，假如連醫生都冧檔，邊個去救死扶傷呀？莫非周一嶽親自落場呀？即使佢肯，病人都唔制啦，點知佢做慣高官有冇醫術生疏㗎！
計功夫茶話齋，醫管局寧願明益退休高層都唔想盡辦法解決人手不足嘅問題，等於漠視民怨，隨時自取滅亡。你知啦，萬一醫護人員真係採取工業行動，全世界嘅矛頭一定會集中指向周一嶽，到時咯喎，功夫茶第一個帶頭叫口號：周一嶽落局！