政情：KK嘆做人大都被搜身
「茉莉花革命」搞到內地草木皆兵，正在召開全國人大、政協「兩會」嘅北京更加處處杯弓蛇影，港區全國人大代表黃國健（ＫＫ）前晚下榻北京飯店時，就因一時不慎變成「疑犯」，被公安搜身。ＫＫ慨嘆，做咗九年人大，被公安搜身都係第一次！
身兼人大、政協嘅十幾位立法會議員，前日等立法會三讀通過明年立法會選舉修例，先至啟程上京，ＫＫ話，前晚一落機就下榻酒店，點知入到北飯，保安森嚴，人大代表都無面畀，要接受安檢。ＫＫ以為，循例手續嚟啫，無為意就咁行過金屬檢測機，點知腰間條皮帶有金屬扣，警報隨即響起，在場公安如臨大敵，當佢係犯咁搜身，搞咗一輪，證實ＫＫ身上無可疑物品先至放人兼放行。
ＫＫ話，以前開「兩會」，只要心口掛住人大證件，就喺北飯通行無阻，諗唔到今年關卡重重，直指內地當局有啲神經過敏，話：「如果人大都信唔過，仲信得邊個？」