政情：徐立之帶波Boot撐校隊
香港大學同香港中文大學嘅教職員每年都各自組足球隊，競逐兩大校長盃，不過港大校長徐立之、中大校長沈祖堯尋日就雙雙做座上客，只係喺旁邊做啦啦隊。雖然最後港大輸咗，但徐立之都睇得好肉緊，仲帶埋對收藏三十七年嘅一九七四年世界盃版足球鞋嚟贈興。
兩間大學自沙士後設兩大校長盃，尋日中大以四比二贏港大奪盃，不過兩大校長都無落場，淨係喺場邊吹吓水。徐校長話七十年代喺美國做研究時，間唔中都有跟南美人士踢吓斯文足球，仲趁世界盃熱買咗對世界盃版名牌波鞋，佢拎住波鞋話，當時月薪三百五十美金，但波鞋要成七十美金，可知有幾貴。
徐立之係中大校友，但就做咗港大校長，情況同沈祖堯啱啱掉轉，佢哋話兩隊波應該互換守門員，然後互相「放水」，咁就有球必應啦。最近沈祖堯母校皇仁書院落實減班，沈校長都話有少少唔開心，皆因母校學額爭崩頭，家長會失望喎。