政情：等鬍鬚曾收工一日都嫌長

鬍鬚曾平日同議員交手，耍政治手段了得，儼如患上過度活躍症嘅細路，花招百出，令議員疲於奔命，但係講到政治觸覺，佢就係一個癡呆症（腦退化症）長者，對政治危機反應遲緩，後知後覺。今次預算案創下發表後短短七日內即向民意「跪低」讓步嘅歷史性紀錄，但回首事件，預算案自發表後，鬍鬚曾最初仍然企硬唔肯讓步，以咁嘅政治智慧，好心就唔好裝出一副痛定思痛、大徹大悟嘅樣子畀人睇啦。

表錯七日情

鬍鬚曾文中第一句就話：「政治一個星期都嫌長」，以此總結佢七日「跪低」嘅心情同體會。不過，有深刻體會，唔代表就學到嘢，睇佢尋日喺市民上街前就急不及待強烈暗示，新移民唔會直截了當地得到六千蚊，而係要透過關愛基金至得到關愛，仲要喺新移民問題上火上加油，想市民唔上街都好難嘞。政治問題政治解決，但係鬍鬚曾遲遲疑疑，好似好有原則好有理據，其實佢嘅原則一推就冧，一切都站不住腳。

七日對鬍鬚曾嚟講係乜嘢呢？係市民要佢將預算案功課發還重寫交功課嘅日數，係佢自己低低哋「躀一鋪」將預算案推倒重來嘅日數，其實喺編寫預算案嘅傳統，時間表都十分緊湊，預算案發表前，財政司司長用兩、三個月諮詢意見，預算案發表後，幾時通過撥款條例草案都有先例可循，今次鬍鬚曾平白浪費咗諮詢意見嗰幾個月，畀人狂轟之後就用七日嚟胡亂轉軚，特區政府有一個咁不濟嘅財政司司長，市民捱一日都嫌長，要等多一年零四個月，呢一屆政府至收工，更加不耐煩。

鬍鬚曾自信全失，未來一年多更加唔會好過，唔知佢有冇打算，順應民意提早收工呢？