中環出更：陳啟宗學音樂辟銅臭
專家話音樂可以陶冶性情，恒隆董事長陳啟宗就話，有音樂底子，唔會咁銅臭，人嘅素質都好啲，食物及衞生局副局長梁卓偉就認為，學音樂嘅人通常都有好成就。
梁卓偉撐葉惠康場
話說兩人尋日出席一間兒童音樂實踐中心翻新後開幕禮。梁卓偉都自嘲話，點解搵個管醫院診所、喺街搵老鼠、睇奶粉嘅人嚟剪綵？原來佢係以舊生身份到場，佢話呢度畀佢好多回憶，仲記得小時候同學仔百厭到捐琴底，但今日個個都有成就，唔係狀元就首席指揮、音樂學院話事人。佢仲話依家中心走廊貼咗好多表演嘅相，有一半都有佢細個嘅嘜頭。中心負責人葉惠康對佢讚不絕口，話梁五、六歲就跟佢，又乖又聽話。
至於陳啟宗，佢十六歲喺浸會跟葉惠康學樂理，唔講唔知，原來佢四歲已經學琴，有八級資格，仲攞過音樂比賽冠軍。佢又話識得欣賞古典音樂嘅好難有壞人，有啲人錢賺好多，但人質素差，如果香港無葉惠康，一定淡然無色咁話！