錯打報廢疫苗　衞署草菅人命

一批葛蘭素史克藥廠生產嘅預防流感、肺炎球菌及兒童混合劑，懷疑冷凍出錯影響品質，由批發商收番準備銷毀。點知因為職員疏忽，呢批報廢疫苗被送咗去多間母嬰健康院、私家醫院同診所，其中一百一十六劑已經注射咗添，真係大劑。

大規模打錯疫苗，後果可大可小，你估衞生署有乜嘢反應吖喇？佢哋話喎，冇收到市民接種之後有不良反應嘅報告，就咁輕描淡寫敷衍過去。而更離譜嘅係，本報記者尋日去涉事批發商辦公室了解情況，既見唔到有人返工，更冇衞生署職員上門調查補鑊。有接種咗報廢疫苗兒童嘅家長炮轟，批發商處理報廢疫苗嘅程序十分兒戲。其實，批發商固然兒戲，而衞生署監管失職，事後又反應遲鈍，更加係罪無可恕。

正如藥劑師話齋，呢次係嚴重事故，如果送錯嘅係藥物而唔係疫苗，後果不堪設想。衞生署一句冇收到不良反應報告，就關人個關，翹埋雙手乜都唔做，豈有此理！

話時話，按專家嘅解釋，呢啲報廢疫苗蛋白質可能已受到破壞，病人打咗等於無打。家陣正係流感高峰期，市民注射呢啲疫苗之後隨時中招，分分鐘有致命危險，如果等到有不良反應報告至補鑊，乜都遲喇！

再講吖，唔怕一萬至怕萬一，衞生署唔好以為次次都冇不良反應報告咁好彩。藥物安全關乎性命，稍有差池，市民隨時付上生命代價。前年瑪麗醫院多名癌症病人服用發霉降尿酸藥別嘌醇後死亡，衞生署被踢爆監管失職，冇為藥物做安全檢測。

發霉藥事件發生後，死因庭法官曾經警告當局，必須加強對製藥業嘅監管同執法，避免悲劇重演。點知死者冤魂未散，衞生署又故態復萌，監管甩甩漏漏，責任卸得就卸，搞到問題藥醜聞一單接一單，幾乎無日無之。

呢，發霉藥之後，又先後出現過未註冊藥、過期藥、唔夠秤藥，真係千奇百怪，應有盡有，衞生署直頭變咗「問題藥專門店」，問你服未。唔怪得有人話，喺香港千祈唔好病，唔係嘅話，淨係問題藥都隨時食死你。港府宣傳口號話齋，不可一不可再，衞生署視市民生命如草芥，一而再再而三失職，唔通真係要等到搞出人命至知反省？

衞生署冥頑不靈，等佢哋反省盞嘥氣，計功夫茶話齋，呢次收番嗰批報廢疫苗，索性攞嚟幫署長林秉恩注射，冇不良反應吖嘛，咪等佢試吓咯！