政情：許章榮：派糖唔會通脹
競投馬匹難，但養馬更難，少啲心力同財力都唔掂。好似雅芳婷集團主席許章榮，其愛駒「枕住贏」上星期三拉頭場，就幫佢贏咗三十六萬元獎金，但唔好以為筆獎金可以幫補好多糧草錢，事關養馬仲貴過養人，許老闆話淨係用嚟畀馬匹休息用嘅碎報紙，鋪幾日埋單就要六千蚊，認真誇張，所以財爺派畀市民嘅六千元，只夠鋪幾日碎報紙墊。
許老闆咁講，無非都係想推銷旗下床上用品，佢話如果用六千元買張靚床褥，分分鐘可以瞓十幾年喎，咁樣曲線賣廣告，真係有生意頭腦。現時市民正為政府派發嘅六千元議論紛紛，研究點使筆錢，有人擔心會推高通脹，但許老闆就唔認同，事關唔係每個市民都會攞筆錢去消費，總有人將筆錢作儲蓄用途，相信影響通脹只係好輕微。
許老闆又話，香港通脹主要受外圍影響，所以佢建議港幣同人民幣掛鈎，唔使再受美元貶值影響，拖累港元搭沉船。