政情：阿人吼實市民六千蚊
財爺鬍鬚曾跪低向市民大派六千元，大家期待之餘，好多團體組織都
到實一實。尋日李卓人以支聯會新主席身份上電台節目，同年輕人分享從政經驗，有年輕人開門見山話，好多人以前都係因為前主席司徒華先至出錢撐支聯會，問阿人上場後會否對籌款感到壓力，點知阿人話對籌款好有信心，皆因市民手上有政府派發嘅六千元喎！
阿人提到市民手上嘅六千元，係咪意思叫市民將六千元捐畀支聯會呢？如果係就認真大想頭，估唔到佢連市民嘅血汗錢都敢打主意，唔知華叔在生時會否支持佢咁做呢？不過，阿人話支聯會成立已經超過廿年，相信受華叔感召嘅人唔會因為華叔走咗而唔支持支聯會。
班年輕人又問到阿人點睇近期搞到內地大為緊張嘅「茉莉花革命」，阿人相信呢啲事先張揚嘅行動並唔係真嘅，所以支聯會暫時唔會有乜行動，但當時機成熟嘅時候，佢哋一定唔會袖手旁觀喎。