政情：鐵頭仁激親譚耀宗
民主黨轉軚支持政改方案後，即被外界揶揄已歸邊建制派，喺過去四日嘅政改本地立法辯論期間，亦難逃社民連及人民力量圍剿嘅命運。黨主席何俊仁尋日終於發威向人民力量黃毓民還擊，點知言語間得罪埋民建聯，激到該黨主席譚耀宗發晦氣，發言時講明唔會幫民主黨反駁黃毓民。
話說民主黨提出修訂，建議將超級區會議席嘅門檻由十五人降至十人，但未獲民建聯支持，鐵頭仁尋日就斥責民建聯此舉係怕分薄票源，仲話既然佢哋覺得將提名門檻訂喺十至十五人都可接受，應「與人為善」，支持較低門檻先至啱。
譚Sir一聽到呢句「與人為善」，即時嬲到彈起身好激動話，選舉根本冇數講，話民主黨咁「與人為善」，大可將啲提名、甚至選票分晒畀社民連及人民力量。譚Sir仲自爆本來對民主黨被圍攻深表同情，亦諗住幫民主黨反駁黃毓民，唔明何俊仁點解要講啲得失佢哋嘅說話喎。