政情：哪吒黐發叔搶新東議席

外號「哪吒」嘅方國珊，最近拉攏數十名專業人士成立「專業動力」，似乎想以專業「旗號」殺出血路。不過，建制派消息指，呢啲好有可能只係煙幕，實情過往主力開拓將軍澳票源嘅哪吒，已經埋咗「新界王」劉皇發堆，打算結合鄉事票，揮軍明年立法會新界東議席。發叔唔係開善堂，唔會無條件撐哪吒，佢肯出手，可被視為經濟動力向哪吒下訂婚聘書。

唔急「結合」區選各搵食

消息話，槍打出頭鳥，哪吒同經濟動力唔會急於「結合」，預計年底區議會選舉之前，雙方都會以「各自搵食」姿態示人，到哪吒喺區選勝出，證明有力問鼎明年立法會選舉，先至一拍即合。屆時，新界東嘅鄉事票，將會三分天下，部分照舊投畀民建聯，發叔「嫡系」勢力就歸邊撐哪吒，而自由黨喺新東鄉事經營多年，亦有堅定支持者，但數量比前兩者都要少。

哪吒○八年曾為自由黨榮譽主席田北俊抬轎參選新界東，係黨內最有實力接棒參選新界東嘅第二梯隊，但去年底自由黨經歷高層人事動盪，「未來主席」田北辰退黨，有傳田少部署出山再戰新東，哪吒亦毅然退黨。哪吒退出自由黨，除咗為啖氣，亦為不甘再替人抬轎，出戰意濃，但係單打獨鬥，勝算更微，加盟經濟動力，借助發叔鄉事力量，似乎已係必經之路，現時只係時間性問題。

新東直選 形勢七國咁亂

建制派消息話，明年直選五區，以新界東最為兵荒馬亂，事關新增兩席至九席，同時贏取議席嘅得票門檻攤薄到只需百分之十一左右，必定引嚟各方覬覦，以現時牌面計，除哪吒同自由黨之外，仲有盛傳有意加入戰陣嘅工聯會葉偉明同新民黨嘅代表，新論壇龐愛蘭亦會捲土重來，民主黨會同分裂而出嘅新民主同盟爭票，民建聯部署分兩隊出戰，形勢七國咁亂，未到最後一刻都未知鹿死誰手。

對於埋經濟動力堆嘅講法，哪吒話自己退出自由黨冇幾耐，目前言之尚早，諗住同各個政黨合作一輪，至決定去向喎。