中環出更：曾智雄張俊勇遊日家庭樂
男士要注重事業兼且要做個好丈夫、好爸爸並不容易，好似前全國青聯副主席曾智雄（William）及潮州商會會董張俊勇（Thomas）就兩者兼備，無論工作及公職幾忙都好，每逢放假都會抽時間陪太太同囡囡去旅行，唔會顧此失彼。佢哋兩個家庭都好嚮往日本風情，William一家鍾意北海道，Thomas就陪太太去東京瘋狂購物。
日本向來都係港人旅遊熱門勝地，William同Thomas經常前往之餘，William更係「日本通」，以前差唔多一放假就去玩，但後來因為工作忙，所以愈來愈少去日本。不過，因為太太喜歡日本，所以William去年同今年都先後到過日本，包括太太生ＢＢ之前去咗一趟北海道，上月農曆新年又帶太太去咗大阪遊玩，兩公婆重拾昔日拍拖嘅甜蜜情懷。
至於Thomas都不遑多讓，農曆新年亦帶太太同兩個囡囡去東京玩咗八日，佢笑稱自己專責湊女，等太太全無顧慮瘋狂購物，認真廿四孝老公。不過，Thomas返港無耐，又蠢蠢欲動想去台灣，事關佢哋聖誕節去咗台灣陽明山莊浸溫泉，囡囡大讚舒服之餘，又掛住桃園六福莊嘅野生動物園，所以佢希望盡早出發，滿足囡囡嘅欲望喎！